Ekonomia

2019 urtean Euskal Herriko BPGk +%2,2ko hazkundea izan ostean, erakunde publikoen 2020rako aurreikuspenek Euskal Herrian %1,9ko hazkundea marrazten zuten. Bistan denez, 2020 urteak aurreikuspen guztiak irauli ditu. Espainian, Frantzian eta Alemanian, euskal esportazioen helmuga nagusietan, atzeraldia hasi da ere.

Ekonomiaren finantzarizazioa gorabidean dago eta Euskal Herria ez da salbuespena. Hala, soldatapekoen ordainsariek gero eta pisu txikiagoa dute Barne Produktu Gordinean.

2007/19 aldian inbertsiogileek Hego Euskal Herritik 62.640 milioi euro eraman dituzte atzerrira, gehientsuena 2007 urtean. Bien bitartean, epealdi berean 21.830 milioi euro erakarri dira. Kapital ekonomikoaren nazioarteko joan-etorria handia izan da eta, horren ondorioz, 2007az geroztik Hego Euskal Herriak 40.800 milioi euroko inbertsio defizita du.

Milurteko hasieratik Europako herrialde gehienen ekonomian industriaren pisua ahuldu egin da. Europar Batasunean manufaktura-industriaren pisua gutxitu egin da, manufaktura anitz Asia aldera kanporatu direlako; ez, ordea, Euskal Herrian bezainbeste.

1973 urtean Lurralde Petrolio Esportatzaileen Erakundeak Yom Kipurreko gerran Israelen alde egin zuten herrialdeetara petrolioaren esportazioa etetea erabaki zuen eta petrolio-krisiak euskal ekonomia gogor kolpatu zuen. 2008 urteaz geroztik 1970. hamarkadako petrolio-krisiaren ondoren egituratutako eredu industrialaren ehun zati garrantzitsua desegin da. 2020 inflexio urte berria izan daiteke.